Nesta hora de radio imos coller pico e pala porque vos invitamos a que nos acompañedes de escavación arqueolóxica. Poñede protector solar, agarrade ben o chapeu pra evitar que saia voando co vento e preparádevos para mollar os pes. O punto de partida é o porto da Ribeira de Chazo na Illa de Arousa onde habemos coller un barco-taxi. Logo de navegar un par de millas con rumbo suroeste desembarcaremos na praia dun pequeno illote deshabitado de apenas 600 m de longo de norte a sur. Tras percorrer apenas 200 m descubriremos un pequeno equipo de arqueólogos traballando arreo nunha mámoa. Eles han de ser o noso contacto.
A súa presenza no pequeno illote non é casual. Debaixo das dunas hai un territorio prehistórico case intacto ata o de agora pero que corre perigo de desaparecer por unha acelerada erosión litoral. Quen rematara antes os arqueólogos ou os elementos?
Os micros de Efervesciencia hannos levar o penúltimo dia da campaña de escavación 2017 no Ghuidoiro areoso, que promove a Xunta de Galicia.
O ecólogo Nacho Munilla explícanos porque un niño de gabita atrasou os plans dos arqueólogos.
“Moléculas en Galego” explica a orixe das cores outounais.
Eva Rodríguez de SINC conversa co investigador Ramiro Rodríguez Tato que vén de descubrir dous novos crustáceos bentónicos na costa galega.